काठमाडौं, ३० वैशाख । निर्वाचन आयोगले जनता समाजवादी पार्टी नेपाल (जसपा नेपाल) र लोकतान्त्रिक समाजवादी पार्टी (लोसपा) बीच भएको पार्टी एकीकरणलाई औपचारिक मान्यता दिएका छन् ।
आयोगका प्रवक्ता नारायणप्रसाद भट्टराईका अनुसार मंगलबार बसेको आयोग बैठकले दुई दलको एकतालाई स्वीकृति दिएको हो । यससँगै लोसपा औपचारिक रूपमा जसपा नेपालमा समाहित भएको छ ।
उपेन्द्र यादव नेतृत्वको जसपा नेपाल र महन्थ ठाकुर नेतृत्वको लोसपाबीच गत पुसमा एकीकरण गर्ने सहमति भएको थियो । त्यसपछि दुवै दलले निर्वाचनअघि नै आयोगमा एकताको मान्यताका लागि निवेदन दिएका थिए ।
गत २१ फागुनमा सम्पन्न निर्वाचनमा जसपा नेपालले समानुपातिकतर्फ १ लाख ८२ हजार २८५ मत प्राप्त गरेको थियो ।
