काठमाडौं, २४ बैशाख । स्वास्थ्य तथा जनसंख्या मन्त्रालय नेपाल अन्तर्गत स्वास्थ्य क्षेत्रमा ९७७ नयाँ स्थायी दरबन्दी थप गर्ने प्रस्तावले स्वीकृति पाएको छ ।
स्वास्थ्य मन्त्री निशा मेहताको सचिवालयका अनुसार प्राविधिक तथा विशेषज्ञ जनशक्ति वृद्धि गर्ने प्रस्तावलाई बुधबार ः अर्थ मन्त्रालयले स्वीकृत गरेको हो । मन्त्रालयका अनुसार स्वास्थ्य सेवामा आवश्यक जनशक्तिको अभावलाई ध्यानमा राख्दै नयाँ दरबन्दी थप्न लागिएको हो ।
अब उक्त प्रस्ताव मन्त्रिपरिषद्बाट पारित भएपछि कार्यान्वयन प्रक्रिया अघि बढ्नेछ । स्वास्थ्य मन्त्रालयका अधिकारीहरूका अनुसार स्वास्थ्य क्षेत्रमा करिब तीन दशकदेखि स्थायी दरबन्दी विस्तार हुन सकेको थिएन ।
विगतमा विभिन्न स्वास्थ्य मन्त्रीहरूले प्रयास गरे पनि आवश्यक स्वीकृति प्राप्त हुन सकेको थिएन । स्वास्थ्यकर्मी संगठन र विज्ञहरूले लामो समयदेखि अस्पताल, स्वास्थ्य संस्था तथा विशेषज्ञ सेवामा जनशक्ति अभाव रहेको भन्दै दरबन्दी थप गर्न सरकारसँग माग गर्दै आएका थिए ।
जनसंख्या वृद्धि र संघीय संरचनाअनुसार स्वास्थ्य सेवा विस्तार भइरहेका बेला पुरानो दरबन्दी संरचनाले सेवा प्रवाहमा चुनौती सिर्जना गरिरहेको मन्त्रालयको भनाइ छ । नयाँ दरबन्दी थपिएपछि स्वास्थ्य सेवा व्यवस्थापन थप प्रभावकारी बन्ने अपेक्षा गरिएको छ ।
