काठमाडौँ, २४ वैशाख । नेकपा एमालेका नेता गोकुल वासकोटाले संविधान संशोधनको बहस चलिरहेका बेला प्रदेश संरचना हटाएर केन्द्र र पालिका मात्र रहने व्यवस्था गर्न प्रस्ताव गरेका छन् ।
सामाजिक सञ्जालमार्फत उनले जिल्ला समन्वय समिति अनावश्यक भएको उल्लेख गर्दै राष्ट्रिय सभालाई १०५ सदस्यीय र पूर्ण समावेशी बनाउनुपर्ने बताएका छन् ।
उनले महिला–पुरुष ५०–५० प्रतिशत सहभागिता तथा उपराष्ट्रपतिलाई राष्ट्रिय सभाको अध्यक्ष बनाउने व्यवस्था हुनुपर्ने धारणा राखेका छन् ।
त्यस्तै, प्रतिनिधिसभाको समानुपातिक सिट खारेज गरी प्रत्यक्ष निर्वाचनमा महिला–पुरुष ६०–४० प्रतिशत अनिवार्य गर्नुपर्ने प्रस्ताव पनि उनले अघि सारेका छन् ।
