काठमाडौं, २३ वैशाख । पश्चिमी न्यूनचापीय प्रणाली र स्थानीय वायुको प्रभावका कारण आज देशका विभिन्न भागमा वर्षाको सम्भावना रहेको छ ।
बिहान कोसी प्रदेशमा पूर्ण बदली र अन्य प्रदेशमा आंशिकदेखि सामान्य बदली देखिएको छ भने कोसी, मधेस र बागमतीका केही स्थानमा मेघगर्जनसहित वर्षा भइरहेको छ ।
मौसम पूर्वानुमान महाशाखाका अनुसार दिउँसो कोसी, मधेस, बागमती, गण्डकी र लुम्बिनी प्रदेशका केही स्थान तथा अन्य प्रदेशका पहाडी–हिमाली क्षेत्रमा मेघगर्जनसहित मध्यम वर्षा हुन सक्छ ।
राति पनि पहाडी र हिमाली क्षेत्रमा वर्षाको सम्भावना रहनेछ । काठमाडौँ उपत्यकामा आज दिनभरि बादल लाग्ने, पानी पर्ने र रोकिने क्रम दोहोरिन सक्ने तथा मध्यम वर्षाको सम्भावना रहेको मौसमविद्ले बताएका छन् ।
