काठमाडौ,१९ बैसाख । रामचन्द्र पौडेल ले शनिबार थप तीन वटा अध्यादेश जारी गरेका छन्।
नेपाल सरकार, मन्त्रिपरिषद्को सिफारिसमा नेपालको संविधानको धारा ११४ अनुसार ती अध्यादेश जारी गरिएको हो ।
राष्ट्रपतिको कार्यालयका प्रवक्ता रितेशकुमार शाक्य का अनुसार जारी गरिएका अध्यादेशहरूमा स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने अध्यादेश, २०८३, सार्वजनिक पदाधिकारीको पदमुक्ति सम्बन्धी विशेष व्यवस्था अध्यादेश, २०८३ र विश्वविद्यालय सम्बन्धी केही नेपाल ऐनलाई संशोधन गर्ने अध्यादेश, २०८३ रहेका छन् ।
यी अध्यादेशहरू मार्फत स्वास्थ्य, शिक्षा तथा सार्वजनिक पद व्यवस्थापनसँग सम्बन्धित कानुनी व्यवस्थामा संशोधन तथा सुधार गर्ने उद्देश्य राखिएको छ ।
सरकारले हाल संसद् अधिवेशन नरहेको अवस्थामा तत्काल आवश्यक ठानेका विषयहरूलाई कानुनी मान्यता दिन अध्यादेशको माध्यम अपनाएको हो ।
पछिल्लो समय सरकारले विभिन्न क्षेत्रका सुधार तथा प्रशासनिक व्यवस्थापनलाई तीव्रता दिन अध्यादेशमार्फत निर्णयहरू अघि बढाउँदै आएको छ ।
यसअघि पनि राष्ट्रपति पौडेलले सम्पत्ति शुद्धीकरण मनी लाउन्डरिङ निवारण तेस्रो संशोधन अध्यादेश, २०८३, सार्वजनिक खरिद दोस्रो संशोधन अध्यादेश, २०८३ तथा सहकारीसम्बन्धी अध्यादेश जारी गरिसकेका छन् ।
