काठमाडौ,१९ बैसाख । नेपाली कम्युनिष्ट पार्टी नेकपाले आगामी मङ्सिर महिनामा एकता राष्ट्रिय महाधिवेशन आयोजना गर्ने कार्यतालिका सार्वजनिक गरेको छ ।
पार्टीका संयोजक पुष्पकमल दाहाल प्रचण्डको अध्यक्षतामा बसेको केन्द्रीय कार्य संयोजन समितिको बैठकले मङ्सिर ११ देखि १५ गतेसम्म काठमाडौँमा महाधिवेशन गर्ने निर्णय गरेको हो । शनिबार जारी विज्ञप्तिअनुसार पार्टीले महाधिवेशनलाई व्यवस्थित र चरणबद्ध रूपमा सम्पन्न गर्न विभिन्न तहका अधिवेशनहरूको स्पष्ट समयसीमा तय गरेको छ ।
जसअनुसार साउन मसान्तसम्म सदस्यता नवीकरण तथा विस्तार अभियान सञ्चालन गरिनेछ। भदौ १५ गतेभित्र वडा अधिवेशन, भदौ १६ देखि मसान्तसम्म पालिका अधिवेशन, असोज मसान्तसम्म जिल्ला अधिवेशन र कात्तिक १५ गतेसम्म प्रदेश अधिवेशन सम्पन्न गर्ने योजना बनाइएको छ ।
पार्टीले आगामी जेठ मसान्तभित्र केन्द्रदेखि वडा तथा टोल तहसम्मका सबै संगठनात्मक संरचना, जनवर्गीय मोर्चा तथा भ्रातृ संगठनहरूको एकीकरण र समायोजन प्रक्रिया टुंग्याउने लक्ष्य राखेको छ । यसले पार्टी एकीकरणपछि संगठनलाई पूर्णरूपमा एकीकृत र क्रियाशील बनाउने उद्देश्य राखेको देखिन्छ ।
संगठनात्मक संरचनामा समावेशिता र समानुपातिक प्रतिनिधित्वलाई प्राथमिकता दिइने पनि नेकपाले जनाएको छ । वडादेखि केन्द्रसम्मका सबै कमिटीहरू समानुपातिक र समावेशी सिद्धान्तअनुसार निर्वाचित गरिनेछन् । साथै, अनुभवी र प्रौढ नेतासँगै युवा तथा नवयुवाको उल्लेख्य सहभागिता सुनिश्चित गर्दै ५० प्रतिशतसम्म युवा प्रतिनिधित्व पुयाउने लक्ष्य पार्टीले लिएको छ ।
