काठमाडौं, १८ वैशाख । राजधानीका विभिन्न स्थानबाट हटाइएका सुकुमवासीका लागि पाँच ठाउँमा अस्थायी बसोबासको व्यवस्था गरिएको छ ।
बल्खु, वंशीघाट, बालाजु र शंखमूल क्षेत्रमा रहेका टहरा भत्काइएपछि उनीहरूलाई स्थानान्तरण गरिएको हो । अस्थायी व्यवस्थाअन्तर्गत ललितपुरको धापाखेलस्थित टेवा कार्यालय, भक्तपुरको खरिपाटीस्थित विद्युत तालिम केन्द्र, बोडेको कृषि विकास बैंक तालिम केन्द्र, नगरकोट खानेपानी तालिम केन्द्र र काभ्रेको बनेपास्थित रेडक्रस भवनमा बसोबासको तयारी गरिएको छ ।
स्थानान्तरणअघि दशरथ रंगशालामा सुकुमवासीहरूको विवरण संकलन भइरहेको छ, जहाँ हालसम्म ७२ जनाले स्वेच्छिक रूपमा नाम दर्ता गराएका छन् । विवरण संकलन कार्य सहरी विकास तथा भवन निर्माण विभाग, काठमाडौं उपत्यका विकास प्राधिकरण, बागमती सभ्यता एकीकृत विकास समिति र काठमाडौं महानगर प्रहरीको संयुक्त टोलीले गरिरहेको छ ।
