काठमाडौं, १७ वैशाख । काठमाडौंको चन्द्रागिरि क्षेत्रमा डेरा खोज्ने बहाना बनाएर महिलाहरूको सुनका सिक्री लुट्ने गिरोह पक्राउ परेको छ ।
गिरोहका सदस्यहरूले सडकमा हिँडिरहेका महिलासँग डेराबारे सोधपुछ गर्दै अल्मल्याएर गहना थुतेर मोटरसाइकलमा फरार हुने गरेको प्रहरीले जनाएको छ ।
उनीहरूले विशेषगरी वृद्ध तथा एक्लै हिँडिरहेका महिलालाई लक्षित गर्ने गरेका थिए । प्रहरीले चन्द्रागिरिसहित उपत्यकाका विभिन्न स्थानमा भएका कम्तीमा ७ वटा लुटपाट घटनामा संलग्न ६ जनालाई पक्राउ गरेको छ ।
उनीहरूमाथि अनुसन्धान जारी रहेको छ । लुटमा प्रयोग भएका चोरीका मोटरसाइकलसमेत बरामद गरिएको छ । दिउँसोको समयमा कम भीडभाड हुने बेला रोजेर यस्तो अपराध गरिएको प्रहरीको निष्कर्ष छ ।
