जनकपु, १६ वैशाख । मधेश प्रदेश प्रहरी कार्यालयका डिआइजी गोविन्द थपलिया विरुद्ध तस्कर र व्यवसायीसँग गैरकानुनी आर्थिक असुली गरेको आरोप लागेपछि नेपाल प्रहरी मुख्यालयले एआइजी उमा प्रसाद चतुर्वेदीको नेतृत्वमा ५ सदस्यीय छानबिन समिति गठन गरेको छ ।
छानबिनको प्रारम्भिक निष्कर्षले नेतृत्व परिवर्तन आवश्यक देखाएपछि थपलियालाई फिर्ता बोलाउने र उनको स्थानमा डिआइजी शेखर खनाललाई पठाउने तयारी अन्तिम चरणमा पुगेको छ ।
गृह मन्त्रालय र प्रहरी मुख्यालयबीचको छलफलपछि खनाललाई मधेशको कमाण्ड दिने र डिआइजी ओम अधिकारीलाई अख्तियारमै राख्ने योजना बनेको छ ।
प्रधानमन्त्रीस्तरबाट समेत खनाललाई प्राथमिकता दिने संकेत आएको बताइएको छ । थपलियामाथि घुमुवा प्रहरीमार्फत रकम असुली गरेको आरोप सार्वजनिक भएपछि संगठनभित्र दबाब बढेको थियो, जसले नेतृत्व फेरबदलको निर्णयलाई तीव्र बनाएको हो । औपचारिक निर्णय छिट्टै सार्वजनिक हुने तयारी छ ।
