काठमाडौं, १६ बैशाख । रुपन्देहीमा सवारी दुर्घटना हुँदा दुई जनाको ज्यान गएको छ भने २७ जना घाइते भएका छन् ।
बुटवल–बर्दघाट सडकखण्ड अन्तर्गत गणेशनगरस्थित प्रतीक्षालय नजिक माइक्रो बस र ईभी माइक्रो एकआपसमा ठोक्किँदा उक्त दुर्घटना भएको हो ।
प्रहरीका अनुसार बुटवलबाट बर्दघाटतर्फ जाँदै गरेको लु १ ख ७२८५ नम्बरको माइक्रो बस र नारायणगढबाट बुटवलतर्फ आउँदै गरेको बागमती प्रदेश ००ख ८९२८ नम्बरको ईभी माइक्रो एकआपसमा ठोक्किएका थिए ।
दुर्घटनामा घाइते भएका मध्ये दुई जनाको देवदह मेडिकल कलेज मा उपचारका क्रममा मृत्यु भएको जनाइए । अन्य घाइतेहरूको सोही अस्पतालमा उपचार भइरहेको छ । देवदह खैरेनी प्रहरी चौकीका अनुसार मृतकहरूको पहिचान अझै खुल्न बाँकी रहेको छ ।
