काठमाडौ, १५ बैसाख । जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार आज देशका अधिकांश स्थानमा मेघगर्जन र चट्याङसहित वर्षाको सम्भावना रहेको छ।
तराईदेखि पहाड र हिमाली क्षेत्रसम्म वर्षाको प्रभाव देखिने अनुमान गरिएको छ। काठमाडौँ उपत्यकासहित भैरहवा, सिमरा, जनकपुर र विराटनगरमा हल्कादेखि मध्यम वर्षा हुने सम्भावना छ।
पूर्वी पहाडी क्षेत्र तथा पोखरा, जुम्ला, जोमसोम क्षेत्रमा पनि वर्षा हुने अनुमान गरिएको छ भने पश्चिमी क्षेत्रमा वर्षाको सम्भावना तुलनात्मक रूपमा कम रहेको जनाइएको छ।
हाल स्थानीय वायुसँगै पश्चिमी वायु प्रणाली सक्रिय रहेकाले मौसम बदली भएको मौसमविद्ले बताएका छन्। विभागले मेघगर्जन र चट्याङको जोखिम भएकाले सतर्क रहन सर्वसाधारणलाई आग्रह गरेको छ।
