काठमाडौ, १५ बैसाख । नेपाली कांग्रेसका पूर्वसभापति शेरबहादुर देउवा पक्षको महत्वपूर्ण बैठक काठमाडौंको धुम्बाराहीस्थित होटल स्मार्टमा सुरु भएको छ ।
बैठकमा देउवा समूहका शीर्ष नेताहरू, १४औँ महाधिवेशनबाट निर्वाचित केन्द्रीय सदस्यहरू, विभिन्न जिल्लाका सभापतिहरू तथा काठमाडौं उपत्यकामा उपलब्ध क्षेत्रीय सभापतिहरूको उल्लेख्य उपस्थिति रहेको छ ।
पछिल्लो समय पार्टीभित्र देखिएको आन्तरिक समीकरण, संगठन सुदृढीकरण, तथा आगामी राजनीतिक रणनीतिबारे केन्द्रित भएर छलफल भइरहेको स्रोतले जनाएको छ ।
विशेषगरी, महाधिवेशनपछि पार्टीभित्र देखिएको गुटगत गतिविधि, नेतृत्वबीचको समन्वय, तथा सरकार र संसदमा पार्टीको भूमिकालाई प्रभावकारी बनाउने विषय बैठकको मुख्य एजेन्डा रहेको बताइएको छ ।
साथै, आगामी दिनमा पार्टीलाई एकताबद्ध बनाउँदै संगठनलाई थप सक्रिय बनाउने विषयमा पनि नेतृत्वबीच विचार विमर्श भइरहेको छ ।
