काठमाडौं, १४ वैशाख । जेनजी आन्दोलनका क्रममा आगजनी हुँदा मोरङ जिल्ला अदालतमा क्षति पुगेका मुद्दाका मिसिलमध्ये अधिकांश पुनः संकलन गरिएको भए पनि अझै केही मिसिल हराइरहेका छन् ।
अदालतका अनुसार आगलागी हुँदा कुल १ हजार ४१ वटा विचाराधीन मुद्दाका मिसिल नष्ट भएका थिए । तीमध्ये विभिन्न निकायको सहयोगमा ९ सय ९१ वटा मिसिल पुनः संकलन गर्न सफल भएको अदालतले जनाए ।
तर अझै ५० वटा मिसिल फेला पार्न बाँकी रहेको छ । अदालतको अभिलेख जलेपछि कानुन व्यवसायी, सरकारी वकिलको कार्यालय तथा अन्य सम्बन्धित निकायको सहकार्यमा मिसिल संकलन अभियान अघि बढाइएको थियो । अहिले पनि केही मुद्दाका कागजात जुटाउने प्रयास जारी छ ।
यसैगरी, भदौ २४ सम्म फैसला भइसकेका तर लिखित फैसला तयार नभएका ७८ मुद्दामध्ये ७५ वटा मिसिल प्राप्त भइसकेका छन् भने बाँकी ३ वटा अझै खोजीमै छन् । आगजनीले अदालतको अभिलेख शाखामा रहेका करिब १ लाख २५ हजार मिसिल पूर्ण रूपमा नष्ट गरेको थियो ।
तीमध्ये हालसम्म २ हजार ५ सय ४८ वटा मात्रै पुनः संकलन गरिएको छ । त्यसैगरी फैसला कार्यान्वयन गर्ने तहसिल शाखामा रहेका १ हजार ७ सय मिसिलमध्ये १ हजार ३ सय ५९ वटा संकलन भइसकेका छन् भने ३ सय ४१ वटा अझै जुटाउन बाँकी छन्।
