सिन्धुली, ११ वैशाख । हिरासतमा रहेका २२ वर्षीय श्रीकृष्ण विकको मृत्यु प्रकरणमा न्यायको माग गर्दै राष्ट्रिय स्वतन्त्र पार्टी -रास्वपा) का ६ जना सांसद तथा दलित अधिकारकर्मीहरू जिल्ला प्रशासन कार्यालय, सिन्धुली अगाडि धर्नामा बसेका छन् ।
धर्नामा सहभागी हुने सांसदहरूमा खगेन्द्र सुनार, रिमा विश्वकर्मा, सुष्मा स्वर्णकार, गणेश विक, खिमा विक र आशिष गजुरेल रहेका छन् । सांसद सुनारले प्रहरीमाथि श्रीकृष्णको हत्या गरेको आरोप लगाएका छन् ।
अन्तरजातीय विवाहको विषयमा पक्राउ परेका उनलाई हिरासतमा कुटपिट गरेर ज्यान लिएको र घटनालाई दबाउन प्रमुख जिल्ला अधिकारी -सीडीओ- र प्रहरी प्रमुख -एसपी) बाट दबाब दिइएको पीडित आमाको भनाइ उद्धृत गर्दै उनले सामाजिक सञ्जालमा उल्लेख गरेका छन् ।
उनीहरूले सीडीओ, एसपी र खुर्कोटका इन्स्पेक्टरलाई तुरुन्त निलम्बन गरी निष्पक्ष छानबिन गर्नुपर्ने, साथै संसदीय छानबिन समिति गठन गर्नुपर्ने माग अघि सारेका छन् ।
यसैबीच, बिहान १० बजे प्रशासन कार्यालयमा उपस्थित भई समर्थन जनाउन सांसद सुनारले सामाजिक सञ्जालमार्फत सर्वसाधारणलाई आह्वान पनि गरेका छन् ।
