महोत्तरी, १० बैशाख। महोत्तरीको पिपरा गाउँपालिका-स्थित सहोडवामा बुधबार एक दलित युवक मृत अवस्थामा फेला परेपछि स्थानीयस्तरमा त्रास र आक्रोश फैलिएको छ।
मृतकको पहिचान सोही स्थानका कपिल दासका रूपमा भएको छ। स्थानीय बासिन्दाहरूका अनुसार कपिल दासलाई केही लागुऔषध दुर्व्यसनमा संलग्न युवाहरूले गाउँको चौरमा बोलाएर कुटपिट तथा हत्या गरी घटनालाई आत्महत्या जस्तो देखाउन रुखमा झुन्ड्याइएको आशंका गरिएको छ।
घटनास्थलको अवस्था र स्थानीयको बयानका आधारमा यो घटना योजनाबद्ध हत्या हुन सक्ने प्रारम्भिक अनुमान गरिएको छ।
घटनापछि पीडित परिवार शोकमा डुबेको छ भने स्थानीयहरूले दोषीलाई तत्काल पहिचान गरी कडा कारबाही गर्न माग गरेका छन्।
यद्यपि, परिवारजनले घटनाबारे विस्तृत छानबिन नटुंगिँदै दाहसंस्कार गरिसकेको जनाइएको छ। घटनाको प्रकृति हेर्दा हत्या नै भएको स्पष्ट देखिने भन्दै निष्पक्ष र गहिरो अनुसन्धानको माग चर्किएको छ।
प्रहरीले भने घटनाबारे औपचारिक धारणा सार्वजनिक गर्न बाँकी रहेको छ। यस घटनाले ग्रामीण क्षेत्रमा बढ्दो लागुऔषध दुरुपयोग र त्यससँग जोडिएका आपराधिक गतिविधिहरूप्रति चिन्ता बढाएको छ।
