काठमाडौं, १० वैशाख । संविधान संशोधन बहसपत्र तयार गर्ने कार्यदल–२०८२ को दोस्रो बैठक आज बस्ने भएको छ ।
प्रधानमन्त्रीका राजनीतिक सल्लाहकार असिम शाहको संयोजकत्वमा गठित कार्यदलको बैठक दिउँसो ३ बजे प्रधानमन्त्री तथा मन्त्रिपरिषद् कार्यालयमा बस्नेछ ।
बैठकमा विभिन्न राजनीतिक दलहरूले पेश गरेका लिखित धारणा आधार मानी पहिचान गरिएका संविधान संशोधनका मुद्दाहरू तथा कार्यदलको आगामी कार्ययोजना सम्बन्धी प्रस्तावमाथि छलफल गरिने बताइएको छ ।
यसअघि कार्यदलको पहिलो बैठक गत चैत २५ गते सम्पन्न भएको थियो । कार्यदलमा राष्ट्रिय स्वतन्त्र पार्टीका मोहन आचार्य, नेकपा (एमाले) का तर्फबाट संविधानसभाका सदस्य डा. भीष्मनाथ अधिकारी, नेकपाका तर्फबाट पूर्वकानुनमन्त्री तथा संविधानसभाका सदस्य देवप्रसाद गुरुङ, राष्ट्रिय प्रजातन्त्र पार्टीका संसदीय दलका नेता ज्ञानेन्द्र शाही, तथा राष्ट्रिय जनमोर्चाका महासचिव मनोज भट्ट लगायत सदस्य रहेका छन् ।
