जनकपुर, ९ वैशाख । जनकपुरमा नेपाल पत्रकार महासंघको केन्द्रीय निर्देशनअनुसार मधेश प्रदेश समितिले सरकारी विज्ञापनसम्बन्धी नीतिविरुद्ध मुख्यमन्त्री कृष्ण प्रसाद यादव लाई ज्ञापनपत्र बुझाएको छ।
प्रदेश सचिव हदिश खुद्दारको नेतृत्वमा गएको टोलीले मुख्यमन्त्री कार्यालयमै पुगेर ध्यानाकर्षण गराएको हो । महासंघले संघीय सरकारबाट जारी परिपत्रप्रति असन्तुष्टि जनाउँदै सबै तहका सरकारी निकायलाई विज्ञापन सरकारी सञ्चारमाध्यममा मात्रै दिनुपर्ने निर्देशनले प्रेस स्वतन्त्रता र खुला बजार प्रणालीमाथि असर पार्ने जनाएको छ ।
महासंघका अनुसार यस्तो नीतिले निजी सञ्चारमाध्यम आर्थिक रूपमा कमजोर बन्ने, सयौँ सञ्चार संस्था प्रभावित हुने र हजारौँ पत्रकारको रोजगारी संकटमा पर्ने खतरा बढाउनेछ। साथै, स्थानीय मिडिया कमजोर हुँदा नागरिकको सूचनामा पहुँच घट्ने र लोकतान्त्रिक अभ्यासमा समेत असर पर्ने चेतावनी दिइएको छ ।
महासंघले विज्ञापन वितरण प्रणाली पारदर्शी र समावेशी बनाउन माग गर्दै उक्त निर्णय सच्याउन आग्रह गरेको छ। माग पूरा नभए थप आन्दोलनका कार्यक्रम अघि बढाउने चेतावनीसमेत दिइएको छ ।
ज्ञापनपत्र ग्रहण गर्दै मुख्यमन्त्री यादवले प्रदेश सरकार सञ्चारमैत्री रहेको उल्लेख गर्दै विषयलाई मन्त्रिपरिषद्मा छलफल गरी आवश्यक कदम चाल्ने प्रतिबद्धता जनाएका छन् ।
