सिरहा, ९ वैशाख । सिरहाको गोलबजार नगरपालिका–२ टुडकियाबाट प्रहरीले एक महिलालाई ठूलो परिमाणको गाँजासहित नियन्त्रणमा लिएको छ ।
पक्राउ पर्नेमा स्थानीय गीता कुमारी साह रहेकी छन् । इलाका प्रहरी कार्यालय गोलबजारका अनुसार विशेष सूचनाको आधारमा मंगलबार दिउँसो उनको घरमा छापा मार्दा उनी गाँजा प्याकिङ गरिरहेको अवस्थामा फेला परेकी थिइन् ।
सो क्रममा प्रहरीले प्लास्टिकका झोलामा राखिएको २० किलो ४ सय ग्राम गाँजा बरामद गरेको जनाए । प्रहरी निरीक्षक सुदन केसीका अनुसार प्रारम्भिक अनुसन्धानले साहले विभिन्न स्थानबाट गाँजा संकलन गरी भारततर्फ अवैध रूपमा बिक्री वितरण गर्ने गरेको देखिएको छ । घटनाका विषयमा थप अनुसन्धान जारी रहेको प्रहरीले जनाए ।
