पर्सा, ९ बैसाख । नेपालको प्रमुख व्यापारिक नाका वीरगन्ज हुँदै चालु आर्थिक वर्ष २०८२/८३ को पहिलो नौ महिनामा ६ खर्ब ९४ अर्ब ५ करोड रुपैयाँ बराबरका वस्तु तथा सामान आयात भएको छ ।
वीरगन्ज भन्सार कार्यालयका अनुसार यो आयात गत आर्थिक वर्षको सोही अवधिको तुलनामा ८० अर्ब ४४ करोड रुपैयाँ -करिब १३ प्रतिशत) ले बढी हो ।
गत आर्थिक वर्षको सोही अवधिमा ६ खर्ब १३ अर्ब ६१ करोड रुपैयाँ बराबरको आयात भएको थियो । भन्सार कार्यालयका सूचना अधिकारी उदयसिंह विष्टका अनुसार औद्योगिक कच्चा पदार्थ, पेट्रोलियम र मेसिनरी उपकरणको माग बढेकाले आयातमा उल्लेख्य वृद्धि देखिएको हो ।
चालु आवको नौ महिनामा सबैभन्दा बढी आयात पेट्रोलियम पदार्थको भएको छ । यस अवधिमा १ खर्ब ४८ अर्ब १६ करोड रुपैयाँ बराबरको पेट्रोलियम पदार्थ आयात गरिएको छ, जुन गत वर्षको १ खर्ब ४० अर्ब १० करोड रुपैयाँको तुलनामा वृद्धि हो ।
त्यसैगरी, फलाम तथा फलामजन्य सामग्रीको आयात ६२ अर्ब २६ करोड रुपैयाँ पुगेको छ, जुन अघिल्लो वर्षको ५५ अर्ब ९ करोड रुपैयाँभन्दा बढी हो । औद्योगिक उत्पादन र निर्माण गतिविधि बढ्दै जाँदा यस्तो सामग्रीको माग बढेको देखिन्छ।
भटमासको कच्चा तेल क्रुड सोयाबिन आयल) को आयात पनि उल्लेख्य रूपमा बढेको छ । चालु आवमा ५० अर्ब ४० करोड रुपैयाँको आयात हुँदा अघिल्लो वर्ष यही अवधिमा ३८ अर्ब १५ करोड रुपैयाँ मात्रै थियो । वीरगन्ज भन्सार कार्यालयले चालु आवको नौ महिनामा १ खर्ब ७७ अर्ब ६६ करोड रुपैयाँ राजस्व संकलन गरेको जनाएको छ ।
जसले आयात वृद्धिसँगै राजस्वमा सकारात्मक प्रभाव परेको देखाउँछ । समग्रमा, औद्योगिक कच्चा पदार्थ, ऊर्जा स्रोत र उपकरणको उच्च आयातले मुलुकको उत्पादन र उपभोग दुवै क्षेत्रमा विस्तार भइरहेको संकेत गर्दछ, तर यसले व्यापार घाटा बढ्ने चुनौती पनि देखाएको छ ।
