काठमाडौं,७ बैसाख । पेट्रोलियम पदार्थको मूल्यवृद्धि घटाउन माग गर्दै प्रदर्शन गर्न पुगेका राष्ट्रिय जेनजी नागरिक अभियानका सदस्यहरूलाई प्रहरीले नियन्त्रणमा लिँदै नेपाल आयल निगम परिसरबाट हटाएको छ ।
सोमबार निगम कार्यालय पुगेका प्रदर्शनकारीहरूले मूल्यवृद्धिको विरोध गर्दै घेराउ गर्ने प्रयास गरेका थिए । तर, सुरक्षाकर्मीहरूले तत्काल हस्तक्षेप गर्दै उनीहरूको प्रदर्शनलाई रोक्दै परिसर खाली गराएका थिए ।
त्यसपछि प्रदर्शनकारीहरूलाई बबरमहल चोक क्षेत्रमा लगेर राखिएको थियो । प्रदर्शनकारीहरूले पछिल्लो समय पेट्रोलियम पदार्थको मूल्य लगातार बढ्दै जाँदा सर्वसाधारणको जीवनयापन कठिन भएको भन्दै मूल्य समायोजन गर्न माग गरेका थिए ।
उनीहरूले सरकार र आयल निगमले जनताको आर्थिक अवस्थालाई ध्यानमा राखेर निर्णय लिनुपर्ने बताएका छन् । प्रहरीले भने सम्भावित अवरोध र सुरक्षा जोखिमलाई ध्यानमा राख्दै निगम परिसरमा प्रदर्शन गर्न नदिएको जनाएको छ ।
स्थिति नियन्त्रणमा राख्नका लागि सामान्य बल प्रयोगसमेत गरिएको बताइएको छ, तर ठूलो झडप वा घाइतेको खबर भने आएको छैन । नागरिक समूहहरूले मूल्यवृद्धि विरुद्ध आन्दोलनलाई थप सशक्त बनाउने संकेत दिएका छन् ।
