काठमाडौं, ६ बैशाख । राष्ट्रिय स्वतन्त्र पार्टी (रास्वपा) आगामी स्थानीय तह निर्वाचनलाई लक्षित गर्दै संगठनात्मक तयारीमा जुटेको छ ।
यसका लागि पार्टीले उम्मेदवार क्लब गठन गर्ने तयारी गरेको छ । सोमबार बस्ने केन्द्रीय समितिको बैठकमा उम्मेदवार क्लब गठन र आवेदन आह्वानबारे छलफल हुने कार्यसूची रहेको पार्टीले जनाए ।
पार्टी प्रवक्ता मनिष झाका अनुसार घन्टीघर, वनस्थलीस्थित केन्द्रीय कार्यालयमा बैठक बस्नेछ । रास्वपाले स्थानीय तहका सम्भावित उम्मेदवारलाई पहिचान, छनोट र प्रशिक्षण दिने उद्देश्यले उम्मेदवार क्लब अवधारणा अघि बढाउन लागेको हो ।
वडा अध्यक्षदेखि पालिका प्रमुखसम्मका पदका आकांक्षीहरू क्लबमा दर्ता हुने व्यवस्था रहनेछ । क्लबमा सूचीकृत सदस्यहरूलाई पार्टीले आवश्यक प्रशिक्षण दिने र स्थानीय तहको जिम्मेवारी तथा कार्यप्रणालीबारे जानकारी गराउने योजना रहेको छ ।
यद्यपि क्लबमा दर्ता हुनु अनिवार्य रूपमा सक्रिय राजनीतिक भूमिकासँग जोडिने छैन । उम्मेदवार क्लबको अवधारणा पार्टी सभापति रवि लामिछानेले पहिले नै अघि सारेका थिए । अहिले सोही योजना कार्यान्वयनतर्फ अघि बढाइएको रास्वपाले जनाए ।
