काठमाडौं, ६ बैशाख । काठमाडौंको विष्णुमती खोला किनारबाट हतियार र गोली बरामद भएको छ । आइतबार बिहान सरसफाइका क्रममा चार थान पेस्तोल, ५८ राउण्ड गोली र सात थान म्यागजिन फेला परेको प्रहरीले जनाएको छ ।
काठमाडौं महानगरपालिका–१५ शोभाभगवती क्षेत्रस्थित खोला किनारमा भेटिएका ती हतियारमध्ये टाइप–५४ किसिमका पेस्तोल रहेका छन् । बरामद गरिएको गोलीमध्ये ९ एमएम बेरेटा प्रकारका गोलीसमेत समावेश छन् ।
प्रहरीका अनुसार सरसफाइमा खटिएको टोलीले शंकास्पद वस्तु देखेपछि जानकारी गराएको थियो। त्यसपछि प्रहरी वृत्त स्वयम्भूबाट खटिएको टोलीले हतियार नियन्त्रणमा लिएको हो ।
प्रारम्भिक अनुसन्धानमा ती हतियार कुनै आपराधिक गतिविधिसँग सम्बन्धित हुनसक्ने आशंका गरिएको छ। साथै, अघिल्लो कुनै आन्दोलनका क्रममा सुरक्षाकर्मीबाट हराएका हतियार हुन सक्ने सम्भावनालाई पनि प्रहरीले खुला राखेको छ । घटनाबारे थप अनुसन्धान भइरहेको प्रहरीले जनाएको छ।
