काठमाडौं, ४ बैशाख । सभामुख डोलप्रसाद (डीपी) अर्यालले संसद् परिसरमा पत्रकारहरूको पहुँचलाई सहज र व्यवस्थित बनाउने प्रतिबद्धता व्यक्त गरेका छन् ।
संसदीय मामिला पत्रकार समाज तथा संसदीय रिपोर्टिङमा संलग्न पत्रकारहरूसँगको भेटमा उनले रिपोर्टिङका क्रममा देखिएका समस्यालाई समाधान गर्ने बताए ।
पत्रकारहरूले पछिल्लो समय संसद् भवन प्रवेशमा जटिलता भोग्नुपरेको गुनासो गरेका छन् । प्रतिनिधि सभा र राष्ट्रिय सभाको सभा कक्षमा पुग्न फरक–फरक प्रवेशद्वार हुनु, प्राविधिक प्रक्रिया जटिल हुनु तथा फोटो खिच्दा हुने सुरक्षा कडाइले समाचार संकलनमा अवरोध पुगेको उनीहरूले बताए ।
अन्तर्राष्ट्रिय अभ्यास र प्रेस स्वतन्त्रताको मर्मअनुसार संसद् परिसरभित्र पत्रकारका लागि सहज र सम्मानजनक कार्य वातावरण सुनिश्चित गर्न माग गरिएको थियो । सभामुख अर्यालले हालको संसद् भवन अस्थायी भएकाले केही व्यावहारिक समस्या देखिएको स्वीकार गरे।
उनले नयाँ स्थायी भवन निर्माण सम्पन्न भएपछि यस्ता संरचनागत समस्या समाधान हुने विश्वास व्यक्त गरे । संसद् र प्रेसबीचको सम्बन्ध लोकतन्त्र सुदृढीकरणका लागि महत्वपूर्ण रहेको उल्लेख गर्दै उनले पत्रकारहरूलाई प्रभावकारी र पारदर्शी रिपोर्टिङका लागि आवश्यक सहयोग उपलब्ध गराउने प्रतिबद्धता दोहो¥याए ।
