जनकपुर, ४ बैशाख । धनुषाको बटेश्वर गाउँपालिका–४ स्थित एक बाँसघारीमा ६० वर्षाको जगतबहादुर थापा मृत फेला परेको छ ।
स्थानीयका अनुसार थापाको शव बिहीबार बिहान करिब ९ बजे जगदीश रविदासको बाँसघारीमा भेटिएको हो । परिवारका सदस्यले दिएको जानकारीअनुसार उनी बुधबार साँझदेखि सम्पर्कविहीन भएका थिए ।
छोरा अमित थापाले बुवाले हराउनु अघि मादक पदार्थ सेवन गरेको बताएका छन् । घटनाबारे जानकारी पाएपछि इलाका प्रहरी कार्यालय सखुवा महेन्द्रनगरको टोली घटनास्थल पुगेर अनुसन्धान अघि बढाएको छ ।
प्रहरी निरीक्षक राजाराम यादवका अनुसार प्रारम्भिक अनुसन्धानमा अत्यधिक मादक पदार्थ सेवनका कारण मृत्यु भएको हुन सक्ने अनुमान गरिएको छ। यद्यपि, घटनाको विस्तृत अनुसन्धान जारी रहेको प्रहरीले जनाएको छ।
