काठमाडौं, ३ वैशाख । राष्ट्रिय सतर्कता केन्द्रले कार्यालय समयमा अनुपस्थित रहनेसहित अनुशासनहीनता देखाएका ६३२ जना कर्मचारीमाथि कारबाही गर्न सिफारिस गरेको छ ।
केन्द्रका प्रवक्ता नारायणप्रसाद भट्टका अनुसार विभिन्न सरकारी कार्यालयमा गरिएको छड्के अनुगमनपछि सम्बन्धित कार्यालय प्रमुखलाई ती कर्मचारीविरुद्ध कारबाही प्रक्रिया अघि बढाउन निर्देशन दिइएको हो ।
निजामती सेवा ऐन, २०४९ को दफा ५५ अनुसार पहिलो चरणमा ती कर्मचारीलाई चेतावनी पत्र दिइनेछ र त्यसको अभिलेख कार्यालयमै राखिने व्यवस्था छ । सोही ऐनअनुसार दुई पटकसम्म चेतावनी पाइसकेका कर्मचारीमाथि विभागीय कारबाही हुने प्रावधान रहेको छ ।
प्रवक्ता भट्टले विशेषगरी कार्यालय समयमा अनुपस्थित रहने कर्मचारीलाई लक्षित गर्दै सिफारिस गरिएको बताए । केही कर्मचारीमाथि कारबाही भइसकेको जानकारी समेत केन्द्रमा आइसकेको उनले उल्लेख गरे ।
सेवा प्रवाह बढी हुने कार्यालयहरूमा केन्द्रले विशेष निगरानी बढाएको छ। सातै प्रदेशका विभिन्न जिल्लामा समेत अनुगमन जारी रहेको र दैनिक रूपमा सरकारी कार्यालयहरूको निगरानी भइरहेको केन्द्रले जनाएको छ ।
