काठमाडौं, ३ वैशाख । काठमाडौंमा आयोजित भूतपूर्व सैनिक भेटघाट तथा पुनर्मिलन कार्यक्रममा प्रधानसेनापति अशोकराज सिग्देलले अवकाश प्राप्त सैनिकहरूलाई समाजका उर्जा र आदर्शको स्रोत भएको बताएका छन् ।
उनले राष्ट्रको सार्वभौमिकता र सुरक्षामा उनीहरूको योगदान अविष्मरणीय रहेको उल्लेख गर्दै समाजमा अनुशासित र जिम्मेवार नागरिकका रूपमा सक्रिय रहन आग्रह गरे ।
उनले शिक्षा, स्वास्थ्य, सीप विकास र स्वरोजगारमा पहुँच विस्तार गर्दै सैनिक कल्याणकारी कार्यक्रमलाई पारदर्शी र परिणाममुखी बनाइने बताए ।
साथै, आन्तरिक सुरक्षा, विकास, विपद् व्यवस्थापन र शान्ति स्थापनामा नेपाली सेनाको भूमिकाको प्रशंसा गर्दै भविष्यका चुनौती सामना गर्न सक्षम संस्था निर्माणमा सबैको भूमिका आवश्यक रहेको धारणा व्यक्त गरे ।
