काठमाडौं, २ वैशाख । काठमाडौंमा बसेको मन्त्रिपरिषद् बैठकले विभिन्न प्रशासनिक, कानुनी र नीतिगत निर्णयहरू गरेको छ।
बैठकले उच्च पदस्थ व्यक्तिहरूको सम्पत्ति छानबिनका लागि आयोग गठन गर्ने, सुरक्षा संयन्त्र सुधारका लागि समिति बनाउने तथा अन्तर्राष्ट्रिय सहायतादेखि राजश्व प्रशासनसम्मका विषयमा महत्वपूर्ण निर्णयहरू गरेको सरकारका प्रवक्ताले जानकारी दिएका छन्।
मन्त्रिपरिषद्का निर्णयहरू (बुँदागत)
- बेपत्ता पारिएका व्यक्तिको छानबिन तथा सत्य निरुपण/मेलमिलाप कोषका लागि स्वीट्जरल्याण्डबाट १ मिलियन स्वीस फ्र्याङ्क अनुदान स्वीकार गर्ने।
- आन्तरिक राजश्व विभाग र मातहतका विभिन्न कर प्रशासनका अधिकारीहरूलाई अन्तःशुल्क अधिकृतको रूपमा तोक्ने।
- आर्थिक कार्यविधि तथा वित्तीय उत्तरदायित्व (तेस्रो संशोधन) नियमावली, २०८२ स्वीकृत गर्ने।
- नेपाल–भारतबीच फौजदारी विषयमा पारस्परिक कानुनी सहायतासम्बन्धी सम्झौता प्रतिनिधिसभामा जानकारीका लागि पेश गर्ने।
- संगठन तथा व्यवस्थापन सर्वेक्षणसम्बन्धी राष्ट्रिय मापदण्ड २०८२ स्वीकृत गर्ने।
- २०६२/०६३ पछि उच्च पदमा रहेका राजनीतिक पदाधिकारी र कर्मचारीको सम्पत्ति छानबिन गर्न आयोग गठन गर्ने।
- २०८२ भदौमा भएको घटनाको प्रतिवेदन कार्यान्वयनका लागि सुरक्षा संयन्त्र अध्ययन गर्न तीन सदस्यीय समिति गठन गर्ने।
