काठमाडौं, २ बैशाख। कार्की आयोगको प्रतिवेदनबारे नेपाली कांग्रेसले आन्तरिक अध्ययन तीव्र बनाएको छ।
पार्टी प्रवक्ता देवराज चालिसेले सानेपामा सञ्चारकर्मीसँग कुरा गर्दै भदौ २३ र २४ गतेका घटनासम्बन्धी आयोगको प्रतिवेदनमाथि विस्तृत समीक्षा भइरहेको जानकारी दिए। उनले अध्ययनपछि चाँडै पार्टीको औपचारिक धारणा सार्वजनिक गरिने बताए।
सरकारले गौरीबहादुर कार्कीको संयोजकत्वमा गठन गरेको आयोगको प्रतिवेदन अध्ययन गर्न कांग्रेसले वरिष्ठ अधिवक्ता यदुनाथ खनालको नेतृत्वमा विज्ञसहितको समिति बनाएको थियो। उक्त समितिले लामो अनुसन्धान र विश्लेषणपछि आफ्नो प्रतिवेदन पार्टीलाई बुझाएको हो।
करिब ५२ पृष्ठको प्रतिवेदनमा समेटिएका निष्कर्ष र सुझावका आधारमा कांग्रेसले आफ्नो धारणा तय गर्ने प्रवक्ता चालिसेले बताए।
यससँगै उनले पार्टीको सदस्यता व्यवस्थापनलाई व्यवस्थित र आधुनिक बनाउन डिजिटल प्रणालीमा रूपान्तरण गर्ने काम पनि अघि बढाइएको जानकारी दिए।
