काठमाडौं, २ बैशाख। सरकारले थप चार देशमा वैदेशिक रोजगारीका लागि पुनः श्रम स्वीकृति खुला गरेको छ।
चैत ३० गते बसेको मन्त्रिपरिषद् बैठकको निर्णयअनुसार इजरायल, लेबनान, कुवेत र बहराइनका लागि पुनः श्रम स्वीकृति खुला गरिएको हो।
यसअघि श्रम, रोजगार तथा सामाजिक सुरक्षा मन्त्रालयले फागुन १७ गतेको निर्णयअनुसार मध्यपूर्व तथा खाडी क्षेत्रमा उत्पन्न परिस्थितिलाई ध्यानमा राख्दै ती क्षेत्रका देशहरूमा व्यक्तिगत र संस्थागत श्रम स्वीकृति स्थगित गरेको थियो।
वैदेशिक रोजगार विभागका अनुसार यसअघि साउदी अरेबिया, यूएई, कतार, ओमान, यमन, जोर्डन र टर्कीमा पुनः श्रम स्वीकृति सुरु गरिसकिएको छ। अब इजरायल, लेबनान, कुवेत र बहराइनमा पनि प्रक्रिया पुनः सञ्चालनमा ल्याइएको हो।
इराकका हकमा भने पुस ११ गतेको मन्त्रिपरिषद् निर्णयअनुसार नै श्रम स्वीकृति प्रदान गरिने विभागले जनाएको छ।
