जनकपुर, २९ चैत । धनुषाको मुखियापट्टी मुसहरनिया गाउँपालिकाले २७ विपन्न परिवारलाई नयाँ घर उपलब्ध गराएको छ ।
आइतबार आयोजित कार्यक्रममा गाउँपालिका अध्यक्ष जयकुमार यादवले विभिन्न दातृ संस्थाको उपस्थितिमा घर हस्तान्तरण गरेका हुन् ।
घर निर्माणमा ह्याविटेट फर ह्युमिनिटी नेदरलैण्ड, ह्याविटेट फर ह्युमिनिटी नेपाल, वाटरलैण्ड फाउण्डेशन लगायतका संस्थाले सहयोग गरेका थिए । कार्यक्रममा बोल्दै ह्याविटेट नेपालका राष्ट्रिय निर्देशक एलिजा स्थापितले विपन्न परिवारलाई सुरक्षित आवास उपलब्ध गराउन पाउनु गौरवको विषय भएको बताए ।
गाउँपालिका अध्यक्ष यादवले आवास कार्यक्रमले विकाससँगै मानवीय सहयोग र सहकार्यलाई पनि मजबुत बनाएको उल्लेख गरे । दलित तथा विपन्न परिवारका लागि स्थानीय सामग्री प्रयोग गरी भूकम्प प्रतिरोधी घर निर्माण गरिएको हो ।
उक्त परियोजनाअन्तर्गत हालसम्म ५६ घर निर्माण भइसकेका छन् भने थप ११४ घर निर्माणको तयारी भइरहेको छ । नयाँ घर पाएपछि लाभग्राही परिवारहरू निकै खुसी भएका छन् ।
