काठमाडौं, २९ चैत। आइतबार पनि ओपीडी सेवा सञ्चालन गर्न ले दिएको निर्देशनप्रति आपत्ति जनाएको छ।
सरकारले इन्धन खपत घटाउने उद्देश्यले शनिबार र आइतबार सार्वजनिक बिदा दिने निर्णय गरेकाले उक्त व्यवस्था सबै क्षेत्रमा समान रूपमा लागू हुनुपर्ने संघको धारणा छ।
संघका वरिष्ठ उपाध्यक्ष तथा अर्थोपेडिक सर्जन प्रा. डा. बद्री रिजालले बिदाका दिन चिकित्सकलाई जबरजस्ती काममा लगाइए आन्दोलनमा जान बाध्य हुने चेतावनी दिएका छन्। उनले असुरक्षित वातावरण र न्यून सुविधामा काम गरिरहेका चिकित्सकलाई थप दबाब दिन नहुने बताए।
डा. रिजालका अनुसार आपतकालीन सेवा (इमर्जेन्सी) २४ सै घण्टा सञ्चालन भइरहेकाले ओपीडी सेवाको समय समायोजन गरेर आइतबार बिदा दिन सकिन्छ। उनले बिहान ९ बजेदेखि दिउँसो ३ बजेसम्म सेवा सञ्चालन गर्ने विकल्प सुझाएका छन्।
सातै दिन पूर्ण रूपमा सेवा सञ्चालन गर्नुपर्ने हो भने हालको जनशक्ति दोब्बर बनाउनुपर्ने उनको तर्क छ।
चिकित्सा क्षेत्रलाई आवश्यक पर्दा ‘अत्यावश्यक सेवा’ भन्दै कर्मचारीलाई खटाइए पनि उनीहरूको सुविधा, कार्यघण्टा र अतिरिक्त श्रमको मूल्याङ्कनमा राज्य मौन रहेको आरोप समेत उनले लगाए।
‘चिकित्सकहरू २४ सै घण्टा अन–कल ड्युटीमा रहनुपर्छ, राति फोन आएपछि तुरुन्त अस्पताल पुग्नुपर्छ,’ उनले भने, ‘तर यो अतिरिक्त समय र श्रमको उचित मूल्याङ्कन गरिएको छैन।
