महेन्द्रनगर, २८ चैत । नेपाल–भारत सीमाक्षेत्रमा सुरक्षा व्यवस्थालाई थप प्रभावकारी बनाउन सरकारले जनशक्ति वृद्धि गरेको छ ।
सशस्त्र प्रहरी बल नेपाल अन्तर्गत कैलाली र कञ्चनपुर जिल्लामा कार्यरत इकाइहरूमा अतिरिक्त जनशक्ति परिचालन गरिएको हो । सशस्त्र प्रहरी बल नेपाल नम्बर ७ वैद्यनाथ बाहिनीका अनुसार सीमाक्षेत्रमा चौबीसै घण्टा निगरानी बढाउन ३० जनाको विशेष टोली खटाइएको छ ।
उक्त टोलीले सीमा क्षेत्रमा नियमित गस्ती, निगरानी र संवेदनशील स्थानमा सतर्कता बढाउने कार्य गरिरहेको छ । नेपाल र भारत सीमा नाकाहरूमा तैनाथ सीमा सुरक्षा गुल्म तथा बोर्डर आउट पोस्ट -बिओपी) मार्फत सशस्त्र प्रहरीले चोरी, तस्करी तथा अवैध आवतजावत नियन्त्रणमा कडाइ गरेको जनाएको छ ।
सुरक्षा मजबुत बनाउने मात्र नभई, सशस्त्र प्रहरीले स्थानीय तहसँग सहकार्य गर्दै विद्यालय र समुदायस्तरमा विपद् व्यवस्थापन तथा जनचेतनामूलक कार्यक्रमहरू पनि सञ्चालन गर्दै आएको छ ।
यसले सीमा क्षेत्रमा बसोबास गर्ने नागरिकलाई सुरक्षा र सचेतनाको दुवै पक्षमा सहयोग पुग्ने अपेक्षा गरिएको छ । सरकारको यो कदमले सीमा क्षेत्रमा हुने अवैध गतिविधि नियन्त्रणमा सहयोग पुग्ने तथा समग्र सुरक्षा अवस्था थप सुदृढ हुने विश्वास गरिएको छ ।
