सप्तरी, २८ चैत । जिल्ला प्रहरी कार्यालय सप्तरीले बोक्सी आरोपमा कुटपिट तथा अभद्र व्यवहारमा संलग्न चार जनालाई पक्राउ गरी अनुसन्धान प्रक्रिया अघि बढाएको छ ।
पक्राउ परेकामध्ये एक जनामाथि बोक्सीको आरोप लगाउँदै कुटपिट तथा दुव्र्यवहार गरेको आरोप रहेको छ भने अन्य तीन जना अभद्र व्यवहारसम्बन्धी कसुरमा संलग्न रहेको प्रहरीले जनाएको छ । पक्राउ पर्नेमा सप्तरीको बोदेबर्साइन नगरपालिका–१ निवासी २४ वर्षीय रामनारायण यादव रहेका छन् ।
उनले गत असोज २७ गते सोही स्थानको धनगढी टोलमा एक महिलामाथि बोक्सीको आरोप लगाउँदै गालीगलौज गर्नुका साथै जबरजस्ती मुखमा कालो मसो र सेतो चुन दल्ने प्रयास गरेको आरोप छ ।
पीडित पक्षका अनुसार यादवले स्थानीय ईश्वरवती देवी यादवकी सासू आमा निरासी यादवनीमाथि यस्तो दुव्र्यवहार गरेका थिए । यस्तै, अन्य तीन जनालाई पनि अभद्र व्यवहारसम्बन्धी कसुरमा पक्राउ गरी कानुनी प्रक्रिया अघि बढाइएको छ ।
प्रहरीले यस्ता अन्धविश्वासमा आधारित हिंसात्मक गतिविधि तथा सामाजिक अपराधविरुद्ध कडा कारबाही गरिने चेतावनी दिएको छ । साथै, यस्ता घटनाबारे जानकारी भएमा तत्काल प्रहरीलाई खबर गर्न समेत सर्वसाधारणलाई आग्रह गरिएको छ ।
