काठमाडौं, २८ चैत। सिंहदरबारमा संविधान संशोधन बहसपत्र तयार पार्न गठित कार्यदलको बैठक जारी रहेको छ। कार्यदलका संयोजक तथा प्रधानमन्त्रीका राजनीतिक सल्लाहकार असिम साहको नेतृत्वमा बैठक भइरहेको हो।
बैठकमा यसअघि उठेका विषयहरू र विभिन्न राजनीतिक दलबाट प्राप्त लिखित धारणा सङ्कलन गरी विस्तृत छलफल भइरहेको जनाइएको छ। साथै, संविधान संशोधनका प्रमुख मुद्दा पहिचान गर्ने र आगामी कार्ययोजना तय गर्ने तयारी पनि बैठकले गरिरहेको छ।
उक्त कार्यदलमा विभिन्न दलका प्रतिनिधिहरू सहभागी छन्। राष्ट्रिय स्वतन्त्र पार्टीबाट अधिवक्ता मोहनलाल आचार्य, नेपाली कांग्रेसबाट मोहन आचार्य, नेकपा (एमाले)बाट संविधानसभा सदस्य डा. भीष्मनाथ अधिकारी, नेपाल कम्युनिस्ट पार्टीबाट पूर्व कानुनमन्त्री देव गुरुङ, राष्ट्रिय प्रजातन्त्र पार्टीबाट संसदीय दलका नेता ज्ञानेन्द्र शाही तथा राष्ट्रिय जनमोर्चाबाट महासचिव मनोज भट्ट सदस्यका रूपमा रहेका छन्।
