ललितपुर, २४ चैत । सातदोबाटोमा ट्रकले मोटरसाइकललाई ठक्कर दिँदा दुई जनाको मृत्यु भएको छ ।
मंगलबार दिउँसो सातदोबाटोबाट एकान्तकुनातर्फ जाँदै गरेको ट्रकले सोही दिशामा रहेको मोटरसाइकललाई ठक्कर दिएको प्रहरीले जनाएको छ । दुर्घटनामा ६५ वर्षीय बिदुर गुरुङ र उनकी ८४ वर्षीया आमा धनमाया गुरुङको मृत्यु भएको हो ।
घाइते दुवैलाई अस्पताल लगिए पनि चिकित्सकले मृत घोषणा गरेका थिए । गुरुङ सशस्त्र प्रहरी बलका अवकाशप्राप्त एसपी हुन् ।
ट्रक चालकलाई प्रहरीले नियन्त्रणमा लिएर अनुसन्धान अघि बढाएको छ ।
