जनकपुर, २१ चैत । तत्मा बौद्धिक समाज धनुषाले प्रदेश स्तरीय तत्मा सम्मेलनको तयारीलाई तीव्र बनाउँदै जनकपुरमा बृहत छलफल कार्यक्रम सम्पन्न गरेको छ ।
समाजका अध्यक्ष ई. रामबाबू दासको अध्यक्षतामा सम्पन्न बैठकमा सम्मेलनको मिति, व्यवस्थापन तथा कार्यक्रमको रूपरेखाबारे विस्तृत रूपमा छलफल गरिएको थियो ।
प्रारम्भिक रूपमा बैशाख महिनामा गर्ने योजना भए पनि समय अभावका कारण सम्मेलनलाई जेठ महिनामा सार्ने सहमति गरिएको जनाइएको छ ।
सम्मेलनलाई प्रभावकारी बनाउन विभिन्न चरणमा तयारी अघि बढाउने योजना पनि सार्वजनिक गरिएको छ । पहिलो चरणमा राष्ट्रिय तत्मा समाजका पदाधिकारीहरूसँग समन्वय तथा भेटघाट गर्ने, दोस्रो चरणमा प्रदेशभरका तत्मा समुदायका अगुवाहरूसँग परामर्श गर्ने कार्यक्रम तय गरिएको छ ।
समाजका अध्यक्षका दासका अनुसार सम्मेलनमार्फत तत्मा समुदायको शिक्षा, सामाजिक सशक्तीकरण, अधिकार सुनिश्चितता तथा समग्र विकासका विषयमा गम्भीर बहस गरिनेछ ।
साथै, समुदायका समस्या पहिचान गरी समाधानका लागि साझा रणनीति तयार गर्ने लक्ष्य राखिएको छ । उक्त छलफल कार्यक्रममा समाजका पदाधिकारी, बुद्धिजीवी, समाजसेवी तथा विभिन्न क्षेत्रका समुदाय प्रतिनिधिहरूको उल्लेख्य उपस्थिति रहेको थियो ।
सहभागीहरूले सम्मेलनलाई सफल बनाउन सबै पक्षबीच सहकार्य आवश्यक रहेको धारणा व्यक्त गरेका थिए ।
