जनकपुर, २० चैत । जानकी नवमीको अवसरमा देशभर सार्वजनिक बिदा घोषणा गर्न जनकपुरका धर्मगुरुहरूले सरकारसँग आग्रह गरेका छन् ।
श्री रामानन्दी वैष्णव संघले शुक्रबार पत्रकार सम्मेलन गर्दै यस्तो माग अघि सारेको हो । धर्मगुरुहरूका अनुसार नेपालकी राष्ट्रिय विभूति माता सीताको जन्मोत्सवका रूपमा मनाइने यो पर्वलाई राज्यले पर्याप्त सम्मान दिन सकेको छैन ।
हरेक वर्ष वैशाख शुक्ल नवमीमा पर्ने जानकी नवमीलाई ओझेलमा पार्ने प्रयास भइरहेको भन्दै उनीहरूले चिन्ता व्यक्त गरेका छन् ।
संघका अध्यक्ष तथा जानकी मन्दिरका सह–महन्थ रामरोशन दासले विगतमा पनि पटक–पटक बिदाको माग राखिएको भए पनि सम्बोधन नभएको बताए ।
धार्मिक मान्यताअनुसार त्रेतायुगमा मिथिलाका राजा जनकले यज्ञका क्रममा हलो जोत्दा धर्तीबाट माता सीताको प्रकट भएको विश्वास गरिन्छ। राम नवमीपछि एक महिनामा पर्ने यो पर्व विशेषगरी जनकपुरधाममा भव्य रूपमा मनाइने गरिन्छ ।
यस वर्ष जानकी नवमीलाई नौ दिनसम्म विशेष पूजा, भजनकीर्तन र झाँकी प्रदर्शनसहित धुमधामका साथ मनाउने तयारी भइरहेको संघले जनाएको छ ।
