काठमाडौं, २० चैत । माध्यमिक शिक्षा परीक्षा (एसईई) मा नक्कली परीक्षार्थी बनेर परीक्षा दिन आएका दुई जनालाई मकवानपुर प्रहरीले नियन्त्रणमा लिएका छन् ।
जिल्ला प्रहरी कार्यालय मकवानपुरका अनुसार हेटौंडा उपमहानगरपालिका–१० भुटनदेवी रोडस्थित सोलिड्यारेटी माध्यमिक विद्यालय परीक्षा केन्द्रबाट करिब १८ वर्षीय बिराज बिक पक्राउ परेको हो ।
उनी सिन्धुलीको मरिन गाउँपालिका–४ घर भई हाल हेटौंडा–४ मा बस्दै आएका छन् । प्रहरीका अनुसार बिकले अर्काको नाममा जारी गरिएको प्रवेशपत्रमा आफ्नो फोटो टाँसी परीक्षा दिइरहेका थिए ।
उनी हाल हेटौंडा स्कुल अफ म्यानेजमेन्ट कलेजमा कक्षा ११ मा अध्ययनरत रहेको खुलेको छ । बिकले हेटौंडा–१२ पदमपोखरीका अंकिश श्रेष्ठको नाममा जारी प्रवेशपत्र प्रयोग गरेको पाइएको छ ।
घटनामा संलग्न रहेको आरोपमा अंकिश श्रेष्ठलाई समेत प्रहरीले नियन्त्रणमा लिएको छ । दुवै जनामाथि जिल्ला प्रहरी कार्यालय मकवानपुरमा राखी थप अनुसन्धान भइरहेको प्रहरी नायव उपरीक्षक पुष्कर बोगटीले जनाए ।
