काठमाडौंं, १८ चैत । पर्साका मालपोत कार्यालयमा तत्कालीन चार अधिकृतसहित ८ जनाविरुद्ध भ्रष्टाचार मुद्दा दायर गरेको छ ।
अख्तियार दुरुपयोग अनुसन्धान आयोगले विशेष अदालत काठमाडौंमा मुद्दा दर्ता गरिएको हो । आरोपअनुसार मालपोत अधिकृतहरू हरिनारायण मिश्र, भूपबहादुर बोगटी, पदमप्रसाद अर्याल र सुरेन्द्रप्रसाद राव कुर्मी सहित ८ जनाले राजस्व चुहावट गरी भ्रष्टाचार गरेको अभियोग लगाइएको छ ।
आर्थिक वर्ष २०७०÷७१ मा रजिस्ट्रेसन फाँट ‘ग’ मार्फत संकलन भएको २ करोड ९३ लाख ६८ हजार ५६५ रुपैयाँ राजस्व हिनामिना भएको दाबी गरिएको छ । सोही आधारमा उनीहरूविरुद्ध मुद्दा अघि बढाइएको आयोगले बताए ।
आयोगले मिश्रसँग ३८ लाख ८० हजार ३६८ रुपैयाँ, बोगटीसँग १ करोड १० लाख ६० हजार ५२४ रुपैयाँ, अर्यालसँग २१ लाख ३८ हजार १६९ रुपैयाँ र कुर्मीसँग ९९ लाख १० हजार ५२५ रुपैयाँ बिगो माग गरेको छ ।
यसैगरी, तत्कालीन नायव सुब्बा स्व. किरणप्रसाद उपाध्यायको हकमा उनका अंशियार छोराहरू—राजकिशोरप्रसाद, गौतमप्रसाद, पशुपतिप्रसाद र मुरारीप्रसाद उपाध्यायसँग संयुक्त रूपमा २ करोड ९३ लाख ६८ हजार ५६५ रुपैयाँ बिगो दाबी गरिएको छ ।
