जनकपुर, १७ चैत । मधेश प्रदेशमा पछिल्लो एक वर्षमा २,०९४ वटा हिंसाका घटना भएका छन्, जसमध्ये सबैभन्दा बढी धनुषा जिल्लामा भएका छन् ।
इन्सेक मधेश प्रदेशका तथ्यांक अनुसार धनुषामा दाइजोका कारण १२९ जना पीडित, घरेलु हिंसा ४४९ घटना, र बलात्कार/सामूहिक बलात्कार १२ घटना दर्ता भएका छन् ।
प्रदेश सांसद रुपा यादवले दण्डहीनता, न्याय प्रक्रियामा राजनीतिक हस्तक्षेप र भोटको राजनीतिका कारण हिंसा बढिरहेको बताइन् ।
धनुषा जिल्लका प्रमुख जिल्ला अधिकारी प्रेमप्रसाद लुइँटेलले सामाजिक चेतना र कानुनी ज्ञानको कमी, राजनीतिक प्रभावले घटना बढेको बताए ।
मधेश प्रदेशका डीआईजी गोविन्द थपलियाले सबै घटनालाई कानूनी दृष्टिले अपराध नभए पनि मानव अधिकारसँग जोडिएको उल्लेख गर्दै राजनीतिकरण नगर्न आग्रह गरे ।
कार्यक्रममा सहभागीहरूले सामाजिक सञ्जालमा हुने विभेद र बेइज्जतीसम्बन्धी घटनालाई तथ्यांकमा समावेश गर्नुपर्ने माग पनि राखे ।
