काठमाडौं, १२ चैत । भारतको आन्ध्र प्रदेशमा भएको भीषण सडक दुर्घटनामा कम्तीमा १४ जनाको ज्यान गएका छन् ।
मार्कापुरम जिल्लाको रायावरम नजिकै बिहीबार बिहान निजी बस र ट्रक एकआपसमा ठोक्किँदा दुर्घटना भएको हो । दुर्घटनापछि दुवै सवारी साधनमा आगलागी भएको थियो ।
जसका कारण बसमा सवार यात्रुहरू गम्भीर रूपमा प्रभावित भएको थियो । स्थानीय प्रहरीका अनुसार घटनामा १४ जनाको घटनास्थलमै मृत्यु भएको हो भने अन्य धेरै यात्रु घाइते भएका छन् ।
दुर्घटनामा परेका बस र ट्रक पूर्ण रूपमा जलेर नष्ट भएका छन् । घाइतेहरूलाई उपचारका लागि नजिकैका अस्पतालमा पठाइएको छ । यस घटनाप्रति भारतीय प्रधानमन्त्री नरेन्द्र मोदीले दुःख व्यक्त गर्दै मृतकका परिवारलाई २ लाख रुपैयाँ र घाइतेलाई ५० हजार रुपैयाँ राहत उपलब्ध गराउने घोषणा गरेका छन् ।
