काठमाडौँ, ७ चैत । गृह मन्त्रालय अन्तर्गतको राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार पछिल्लो २४ घण्टामा देशका ३० जिल्लामा ३६ वटा विपद्का घटना भएको छ ।
चैत ६ गते बिहान १० बजेदेखि ७ गते बिहान १० बजेसम्मको अवधिमा भएका यी घटनामा एक जनाको मृत्यु भएको छ भने १४ जना घाइते भएका छन् । उक्त अवधिमा सबैभन्दा बढी चट्याङका घटना भएका छन् ।
९ जिल्लामा भएका १० वटा चट्याङका घटनामा १० जना घाइते भएका छन् । त्यस्तै ७ जिल्लामा ७ वटा आगलागीका घटना हुँदा २ जना घाइते भएका छन् ।
लेक लाग्ने घटनाहरू २ जिल्लामा २ वटा भएका छन्, जसमा एक जनाको मृत्यु र एक जना घाइते भएको हो । यसका साथै अविरल वर्षा, पहिरो, हावाहुरी र जनावरको आक्रमणका घटनाहरू पनि विभिन्न स्थानमा दर्ता भएका छन् ।
