एजेन्सी । भारतको झारखण्ड राज्यमा सोमबार साँझ एउटा चार्टर्ड एयर एम्बुलेन्स विमान दुर्घटनाग्रस्त हुँदा ७ जनाको ज्यान गएको छ ।
दुर्घटनामा परेको विमान रेडबर्ड बीचक्राफ्ट किङ एयर बी–९० एल मोडेलको रहेको भारतीय सञ्चारमाध्यमले जनाएका छन् । उक्त विमान झारखण्डको राजधानी रांचीबाट उडान भरेको केही समयमै चत्रा जिल्लाको समरिया क्षेत्रस्थित जंगलमा दुर्घटनाग्रस्त भएको हो ।
प्रारम्भिक विवरणअनुसार खराब मौसम वा प्राविधिक समस्याका कारण दुर्घटना भएको हुनसक्ने अनुमान गरिएको छ, यद्यपि आधिकारिक पुष्टि हुन बाँकी छ ।
विमान बिरामीलाई थप उपचारका लागि दिल्ली लैजाँदै गरेको एयर एम्बुलेन्स थियो । दुर्घटनामा विमानमा सवार सबै ७ जनाको घटनास्थलमै मृत्यु भएको भारतीय अधिकारीहरूले बताएका छन् ।
मृत्यु हुनेमा क्याप्टेन विवेक विकास भगत (पाइलट), क्याप्टेन सबराजदीप सिंह (सह–पाइलट), बिरामी संजय कुमार, उनका परिवारका सदस्य अर्चना देवी र धुरु कुमार, डाक्टर विकास कुमार गुप्ता तथा प्यारामेडिकल स्टाफ सचिन कुमार मिश्रा रहेका छन् ।
दुर्घटनापछि स्थानीय प्रशासन, प्रहरी तथा उद्धार टोली घटनास्थलमा पुगेका थिए ।
