काठमाडौँ, ११ फागुन । पृथ्वी राजमार्ग अन्तर्गत धादिङको बेनीघाट रोराङ गाउँपालिका–५ भैंसीगौडामा भएको बस दुर्घटनामा ज्यान गुमाएका १९ जनामध्ये ९ जनाको सनाखत भएको छ ।
पोखराबाट काठमाडौंतर्फ आउँदै गरेको ग २ ख १४२१ नम्बरको यात्रुवाहक बस सोमबार बिहान अनियन्त्रित भई करिब २०० मिटर तल त्रिशुली नदी किनारमा खसेको थियो ।
जिल्ला प्रहरी कार्यालय धादिङ जिल्लाका अनुसार मृतकमध्ये एक विदेशी नागरिकसहित ९ जनाको पहिचान खुलेको छ भने अन्य १० जनाको सनाखत हुन बाँकी छ ।
दुर्घटनामा २५ जना घाइते भएका छन्, जसको विभिन्न अस्पतालमा उपचार भइरहेको छ । गम्भीर घाइतेमध्ये १४ जनाको राष्ट्रिय ट्रमा सेन्टरमा उपचार भइरहेको प्रहरीले जनाएको छ। घटनाबारे थप अनुसन्धान जारी छ ।
