काठमाडौँ, २३ माघ । चुनावी अभियानमा प्रयोग गरिएको सवारीसाधनको ठक्करबाट रौतहटमा ४ वर्षीया बालिकाको मृत्यु भएपछि राष्ट्रिय स्वतन्त्र पार्टी (रास्वपा) ले घटना गम्भीरतापूर्वक लिएको जनाएको छ ।
पार्टीका महामन्त्री कविन्द्र बुर्लाकोटीले जारी गरेको विज्ञप्तिमा पीडित परिवारप्रति समवेदना व्यक्त गर्दै राहत, सहयोग र न्यायका लागि आवश्यक पहल गरिने उल्लेख छ ।
रास्वपाले घटनाको निष्पक्ष छानबिनका लागि प्रशासनलाई पूर्ण सहयोग गर्ने र कानुनी प्रक्रियामा कुनै कसर बाँकी नराख्ने प्रतिबद्धता जनाएको छ ।
साथै, चुनावी अभियानमा सवारीसाधन प्रयोग गर्दा उच्च सतर्कता र सुरक्षा संवेदनशीलता अपनाउन पार्टीका सदस्य, उम्मेदवार र चालकलाई निर्देशन दिएको छ । उक्त घटना बिहीबार दिउँसो रौतहट–२ मा रास्वपा उम्मेदवार शेख सगिरको प्रचारका क्रममा भएको हो ।
ठक्करबाट गम्भीर घाइते बालिकाको उपचारका क्रममा मृत्यु भएको प्रहरीले जनाएको छ । चालकलाई प्रहरीले नियन्त्रणमा लिएको छ ।
