काठमाडौं, २९ पुस । केही दिनअघि त्रिशूली नदीमा फेला परेको बस डेढ वर्षअघि चितवनको भरतपुर महानगरपालिका–२९ सिमलतालमा भेल पहिरोले बगाएर नदीमा खसालेको गणपति डिलक्स नै भएको पुष्टि भएको छ ।
आइतबार बिहान त्रिशूली नदीमा बसको केही भाग देखिएपछि नेपाली सेना, नेपाल प्रहरी र सशस्त्र प्रहरीले संयुक्त रूपमा खोज तथा उद्धार कार्य तीव्र पारेका थिए ।
खोतल्ने क्रममा बसको शरीरमा ‘गणपति डिलक्स’ लेखिएको भाग फेला परेपछि उक्त बस सिमलताल दुर्घटनामा परेको गणपति डिलक्स नै भएको चितवनका प्रमुख जिल्ला अधिकारी गणेश अर्यालले जानकारी दिए ।
प्रमुख जिल्ला अधिकारी अर्यालका अनुसार बस निकाल्ने कार्य अहिले पनि जारी छ । नदीको बहाव र भौगोलिक कठिनाइका कारण उद्धार कार्य चुनौतीपूर्ण बनेको छ ।
यसअघि त्रिशूली नदीको वारीतर्फ व्यापक खोजी गरिए पनि बस भने नदीको पारीतर्फ फेला परेको हो । उक्त दुर्घटना विसं २०८१ असार २८ गते भएको थियो ।
वीरगञ्जबाट काठमाडौं आउँदै गरेको बागमती प्रदेश ०३–००६ ख १५१६ नम्बरको एन्जल डिलक्स र काठमाडौंबाट गौरतर्फ जाँदै गरेको बागमती प्रदेश ०३–०११ ख २४९५ नम्बरको गणपति डिलक्स बस सिमलतालमा आएको भेल पहिरोका कारण त्रिशूली नदीमा खसेर बेपत्ता भएका थिए ।
दुवै बसमा गरी ६५ जना यात्रु सवार थिए । तीमध्ये ३ जनाले ज्यान जोगाएका थिए भने ६२ जना यात्रु बससँगै नदीमा बेपत्ता भएका थिए । दुर्घटनापछि हालसम्म २६ जनाको शव फेला परेको छ भने बाँकी यात्रु अझै बेपत्ता रहेका छन् ।
