एजेन्सी, ४ पोष । अमेरिकामा भएको विमान दुर्घटनामा पूर्व नास्कार चालक ग्रेग बिफल र उनका परिवारका सदस्यसहित सातजनाको मृत्यु भएका छन् ।
नर्थ क्यारोलिनाको स्टेट्सभिल क्षेत्रमा सेस्ना ५५० व्यवसायिक जेट दुर्घटनाग्रस्त हुँदा भीषण आगलागी भएको अन्तर्राष्ट्रिय सञ्चारमाध्यमले जनाए । स्थानीय समयअनुसार राति करिब पौने ११ बजे दुर्घटना भएको हो ।
फ्लोरिडातर्फ गइरहेको उक्त विमान खराब मौसमका कारण फर्किने प्रयासका क्रममा दुर्घटनामा परेको बताइएको छ । दुर्घटनापछि सम्बन्धित विमानस्थल अस्थायी रूपमा बन्द गरिएको छ ।
रनवेमा रहेका भग्नावशेष हटाएपछि मात्रै विमानस्थल पुनः सञ्चालन गरिने अधिकारीहरूले जानकारी दिएको छ ।
