जनकपुर, २ पुस । जनकपुरस्थित तिरहुतिया गाछीमा गत मंसिर २० गते आयोजित नेपाल कम्युनिष्ट पार्टी (नेकपा) मधेश प्रदेश कार्यसमितिको एकता सन्देश सभामा विभेदको एउटा अनौठो र दुःखद दृश्य देखिएको छ ।
कार्यक्रमका क्रममा दलित समुदायको परम्परागत लोकनृत्य झिजिया प्रस्तुत गर्न नदिइएको भन्दै आलोचना सुरु भएको छ । सन्देश सभामा नेकपाका केन्द्रीय स्तरका शीर्ष नेताहरू पुष्पकमल दाहाल (प्रचण्ड), माधवकुमार नेपाल र झलनाथ खनालको उपस्थिति रहेको थियो ।
कार्यक्रममा विभिन्न समुदायका लोकनृत्य समूहहरूले सांस्कृतिक प्रस्तुति दिएका थिए । तर महोत्तरी जिल्लाको जलेश्वर नगरपालिका–१ बाट सहभागी भएको दलित समुदायको झिजिया नृत्य टोलीलाई भने आयोजकले प्रस्तुति दिन नदिएको आरोप लागेको छ ।
झिजिया टोलीका सदस्यहरू कार्यक्रम स्थलमा चार–पाँच घण्टासम्म आफ्नो पालो पर्खेर बसे पनि अन्ततः प्रस्तुति दिन नपाई अपमानित महसुस गर्दै घर फर्किनुपरेको उनीहरूको गुनासो छ ।
उनीहरूले यस्तो व्यवहारले दलित समुदायप्रति अझै पनि विभेद कायम रहेको सन्देश दिएको बताएका छन् । झिजिया नृत्य मधेशको पहिचान र सांस्कृतिक सम्पदासँग जोडिएको परम्परागत लोकनृत्य हो ।
यस्तो नृत्यलाई राजनीतिक मञ्चमै उपेक्षा गरिनु गम्भीर विषय भएको भन्दै स्थानीय बुद्धिजीवी तथा सामाजिक अभियन्ताहरूले घटनाको छानबिन र आयोजकबाट स्पष्ट जवाफ माग गरेका छन् ।
