काठमाडौँ, २७ मंसिर । चिसो र सुख्खायामको प्रभाव बढ्दै जाँदा देशभर आगलागीका घटना तीव्र रूपमा बढिरहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ।
प्राधिकरणले आम नागरिक र सम्बन्धित निकायलाई उच्च सतर्कता अपनाउन आग्रह गरेको छ । शुक्रबार जारी विज्ञप्तिमा प्राधिकरणले पछिल्लो एक महिनाको विवरण सार्वजनिक गर्दै आगलागीबाट भएको मानवीय क्षतिप्रति चिन्ता व्यक्त गरेका छन्।
प्राधिकरणका अनुसार २०८२ कात्तिक २५ देखि मंसिर २६ गतेसम्म देशका विभिन्न स्थानमा भएका आगलागीका घटनामा ८ जनाको मृत्यु भएको छ भने ५५ जना घाइते भएका छन् ।
प्राधिकरणले सानो लापरवाहीले ठूलो दुर्घटना निम्त्याउन सक्ने भएकाले विद्युत् प्रयोग, खाना पकाउने ग्यास, आगो बाल्ने कार्य तथा ज्वलनशील सामग्री प्रयोगमा विशेष ध्यान दिन आग्रह गरेको छ ।
