काठमाडौं, १६ मंसिर । माज सदाकत र अनिल शाहको उत्कृष्ट अर्धशतकिय प्रदर्शनमा जनकपुर बोल्ट्सले सिद्धार्थ बैंक नेपाल प्रिमियर लिग (एनपीएल) २०२५ मा आफ्नो पहिलो जित दर्ता गर्न सफल भएको छ ।
चार खेलसम्म जीतविहीन रहेको जनकपुरले चितवन राइनोजले दिएको १७७ रनको लक्ष्य १७.३ ओभरमै ४ विकेट गुमाएर पूरा गर्यो । जनकपुरका लागि पाकिस्तानी अलराउन्डर माजले ३० बलमा ६ चौका र ४ छक्का सहित ६३ रन बनाए भने अनिलले ३६ बलमा ६१ रन योगदान दिए ।
माज–आसिफको ४५ रनको साझेदारीपछि माज–अनिलले दोस्रो विकेटका लागि ७९ रन जोडे । अन्त्यतिर आदित्य महताले ७ बलमा अविजित १८ रन थपे ।
चितवनका सोहेल तनविर, कमलसिंह ऐरी र अमरसिंह राउटेलाले १–१ विकेट लिए । पहिलो जितसँगै जनकपुरले पाँच खेलमा २ अंक जोड्दै प्लेअफको आशा जोगाएको छ । पाँच खेलमै तेस्रो हार बेहोरेको चितवन भने ४ अंकसहित चौथो स्थानमा छ ।
